الخميس، 25 مارس 2010

بستنظرك


سأستيقظ كل يوم في الصباح على صوتك ، لترزع لي اليوم ورداً

ستحتملني وقت غضبي وضيقي وضعفي وتراني دوماً محبوبتك الجميلة

ستمنحني بمحبتك قوة وبوجودك أماناً وبعينيك طريقاً أرى به العالم من خلالك أجمل

سأستكين على صدرك عند التعب وأحتمي بك وقت المطر وأسكن بداخلك إذا لفظني العالم

ستحكي -عني- للشجر وللنهر وللبشر ، وستحكي -لي- كل ليلة حدوتة تضمنا سوياً

سأحسبك عشيرتي في لحظات الوحدة وأمني حين يهزني الخوف

سأأتمنك على نفسي فتصير عليها أميناً

سأنتظرك دوماً .. عالمة بأنك ستأتي

وسأحبك .. كما لم أحب أحداً من قبلك

السبت، 13 مارس 2010

الخميس، 4 مارس 2010

أميرة حبي أنا


مش هما تلات سنين اللي بينا ؟ ، بس دايماً بحس إن عمري ما كنت هبقى البني آدمة اللي أنا هي لو مكنتيش انت موجودة جنبي

تيتة كانت دايماً بتقول إنك العاقلة والحكيمة بتاعة البيت ، وأنا العندية أم دماغ ناشفة ، ساعات كتير ببقى عارفة إن انت اللي صح ومع ذلك بعمل اللي دماغي فيه ، ولما أخبط في الحيط وأرجع أسألك أو أحكيلك تنسي كإنك مقلتليش من الأول إن ده هيحصل ، وتبتدي تكلميني تبعاً للي حصل

لما ببص لكل الحاجات الحلوة اللي حبيتها وارتبطت بيها بلاقيها بدأت من عندك

بفرح دايماً إن عندك القدرة دي عشان تعرفي انت عايزة إيه وتعمليه مهما كان اللي حوالينا رافضينه أو مهما كانت وجهه نظر الناس فيه ، زي إنك تقرري تدرسي في القاهرة رغم المجهود اللي كان عليكِي على مدار أربع سنين عشان تعملي ده ، أو إنك تسيبي خطيبك بعد سنة عشان عند لحظة مكنتش حاسه بالأمان معاه ، بحب الطريقة اللي بتقنعي بيها بابا وماما بالحاجات اللي مش مقتنعين بيها ، وبحبك أوي لما بتقفي جنبي قدامهم حتى لو اللي عملته أو هعمله مش على هواكي ، فاكرة لما همستي في ودني "لينا أوضة تلمنا" ؟؟ ، كان دايماً لينا أوضة تلمنا

افتكرت كل ده عشان إمبارح لما كُنت مخنوقة من غير سبب واتعصبت على ماما وعليكي ، سبتيني لحد ما هديت وبعدين خدتيني البلكونة وفضلتي ساكتة لحد ما ابتديت أتكلم ، مش بس مزعلتيش مني ، انت عرفتي تصالحيني لحظتها على نفسي

ربنا يخليكي ليا يا أميرة